दमक/ झापाको दमकमा लागूऔषध खैरो हेरोइन सहित एक युवक पक्राउ परेका छन्।
दमक नगरपालिका–२ का २९ वर्षीय सन्तोष थापालाई लागूऔषध कारोबार गरिरहेको गोप्य सूचनाका आधारमा इलाका प्रहरी कार्यालय दमकबाट खटिएको प्रहरी टोलीले पक्राउ गरेको हो।
प्रहरीका अनुसार मंगलबार राति करिब ९ बजे प्रहरी नायब निरीक्षक खगेन्द्र डाँगीको कमाण्डमा खटिएको सादा पोसाकसहितको टोलीले थापाको कोठामा खानतलासी गर्दा प्लास्टिकका स–साना पोका बनाएर लुकाइराखेको अवस्थामा खैरो हेरोइनजस्तो देखिने पदार्थ फेला पारेको थियो।
बरामद पदार्थको तौल प्लास्टिकसहित १० ग्राम ९२० मिलिग्राम र प्लास्टिकबाहेक ६ ग्राम १७० मिलिग्राम रहेको प्रहरीले जनाएको छ।
प्रहरीले घटनास्थलबाट डिजिटल तराजु एक थान र नगद १४ हजार ५ सय रुपैयाँसमेत बरामद गरेको छ।
लागूऔषधसहित पक्राउ परेका थापालाई इलाका प्रहरी कार्यालय दमकमा राखी घटनाबारे थप अनुसन्धान भइरहेको प्रहरीले जनाएको छ।
उक्त स्थान इलाका प्रहरी कार्यालय दमकबाट करिब ३ दशमलव ५ किलोमिटर उत्तर–पश्चिममा पर्छ।
