काठमाडौँ/ काठमाडौँ महानगरका मेयर बालेन्द्र शाह (बालेन) पुनः एकपटक आफ्नो अभिव्यक्तिका कारण चर्चाको केन्द्र बनेका छन्।
मध्यरातमा उनले सामाजिक सञ्जालमार्फत लेखेको विवादास्पद स्ट्याटस केही मिनेटमै हटाए पनि, त्यसको स्क्रिनसट अहिले सोसल मिडियामा व्यापक रूपमा भाइरल बनेको छ।
शाहले अमेरिका, भारत, चीनजस्ता शक्तिशाली मुलुकहरू र नेपाली प्रमुख राजनीतिक दलहरू — एमाले, कांग्रेस, माओवादी, रास्वपा र राप्रपा — सबैलाई लक्षित गर्दै तीखो र आपत्तिजनक टिप्पणी गरेका थिए।
उनको शब्दचयन अशिष्ट र कूटनीतिक रूपमा अत्यन्त संवेदनशील भएको भन्दै विभिन्न तर्फबाट आलोचना सुरु भएको छ। धेरैले उनको अभिव्यक्तिलाई ‘अतिरञ्जित आक्रोश’ भनेका छन् भने केहीले ‘राजनीतिक र कूटनीतिक मर्यादा नाघिएको’ टिप्पणी गरेका छन्।
पोस्ट केही समयमै शाहले हटाए पनि स्क्रिनसट अहिले सामाजिक सञ्जालमा तीव्र रूपमा फैलिँदै गएको छ।
अघिल्ला समयमा पनि बालेन शाह आफ्ना तिखा, खुला र अनौपचारिक अभिव्यक्तिका कारण विवादमा तानिँदै आएका थिए। यो घटनाले फेरि एकपटक उनको राजनीतिक शैली र सार्वजनिक अभिव्यक्ति संस्कारमाथि गम्भीर प्रश्न उठाएको छ।
